Bali, Indonesia
10/07/2024 to 12/07/2024
பல நாட்கள் நடந்து நடந்து வலியெடுத்த கால்களுக்கு சிறிது மசாஜ் செய்து ஓய்வு கொடுத்த பிறகு, காலை ஒன்பதரை மணிக்கு, ஜூனா விஜயாவும் அவரது மனைவியும், என்னை அவர்களது காரில் வரவேற்றனர். ஜூனா விஜயா நண்பர் சம்பந்தம் மகள் மற்றும் அவரது மருமகன் பாலி பயணம் சென்ற போது பழக்கமானவர். மிக நட்பாகப் பழகினார்.
பாலியில் பார்க்க வேண்டிய இடங்கள் அனைத்தும் ஏற்கனவே பார்த்து வி்ட்டதால், ATV ( All Terrain Vehicle) four wheel scooterல் செல்ல ஏழு இலட்சத்து ஐம்பதாயிரம் என விலையைக் குறைத்து (13 இலட்சத்திலிருந்து, மதிய உணவு தேவையில்லை என்றுகூறி) பாதுகாப்பு தலைக் கவசம் மற்றும் நீரில் நனையாமலிருக்க கம் பூட் அணிந்து, பைக் ஸ்டார்ட் செய்வதைக் கற்று, பயிற்சி ரவுண்டில் ஹேண்டில் திருப்பவே கடினமாக இருந்தது. பைலட் வண்டி முன்னே போக, எனக்கு முன்னும் பின்னும், ஒரு குடும்பத்தைச் சேர்ந்த பெற்றோரும் இரு குழந்தைகளும். முதலில் குறுகிய கிராமத்துச் சாலையில் நெல் வயல்களூடே பயணித்து, கரடு முரடான பாதையில் திரும்பி, கல்லும் மணலுமான பாதையில் பைக் பயணித்தது. வளைவுகளில் திருப்புவது மிகக் கடினமாகவே இருந்தது. அடுத்த கட்டம் நீர் நிறைந்த பாதை, அதற்கடுத்து ஆழமான நீர் நிறைந்த பாதை, குகை போன்ற பாதை, நீர் தேங்கிய பாதை, U வளைவு, Slope என்று வித விதமான பாதைகளில் ஓட்டுவது மிகவும் திரில்லிங் , லாவகமாக திருப்ப வேண்டும், சில இடங்களில் பள்ளங்களில் விழும் அபாயமும் உண்டு. கடினமான பாதைகளில் இரண்டு மூன்று முறை வலம் வர பைலட் அவகாசம் கொடுத்தார். மீண்டும் தார்ச்சாலை வழியாகப் புறப்பட்ட இடத்துக்கே வந்து சேர்ந்த போது ஒரு தேர்ந்த டிரைவர் போல மனது குதூகலித்தது.
அங்கிருந்து புறப்பட்டு, Swing (இந்த இடம் சிறிய அளவே) இடத்துக்கு வந்து, மதிய உணவு ஆர்டர் முதன் முறையாக மீன் மற்றும் சிப்ஸ் ஆர்டர் செய்து சாப்பிட்டு, பில்லைப் பார்த்த போது ஒரு சிறிய ஷாக். 21% Tax என்று மெனு விலையோடு சேர்த்து pay பண்ண வேண்டி இருந்தது. போகும் வழியில் ஓரிடத்தில் கைத்தறி நெசவும், துணி பிரிண்டிங்கும் செய்வதைப் பார்த்து, கடையில் நுழைந்த போது விலை கிருஷ்ணா மார்க்கெட் போன்று ஐந்து மடங்காய் இருந்தது.
இனி பார்க்க வேண்டிய இடம் ஏதுமில்லை என்பதால் மிக நீண்ட பயணம் செய்து, ஓட்டலை அடைந்து தம்பதியருக்கு விடை கொடுத்து அனுப்பிய பிறகு, முதுகு, தோள்பட்டை, கால்களுக்கு மசாஜ் செய்து, இரவு உணவுக்குப் பிறகு ஓய்வு.
மறுநாள் எந்தப் பயணமும் இல்லாததால், நடந்து அருகே உள்ள கடற்கரை சென்று அமர்ந்து சில மணி நேரம், அயல் நாட்டவர் பலரும் Tanning செய்வதைப் பார்த்து, வெயில் அதிகமானதால் அறைக்குத் திரும்பி ஓய்வுக்குப் பிறகு மாலையில் மீண்டும் கடற்கரை சென்ற போது கூட்டமிருந்தது. பெரும் பாலும் பாலி மக்கள் சிறுவர்களுடன் குளித்து மகிழ்வதைப் பார்க்க முடிந்தது. பட்டங்கள் பல வடிவங்களில் பறந்து கொண்டிருந்தன. இருட்ட ஆரம்பித்தபோது, இந்த ஊர் இளநீர் மிகப் பெரியதாகவும் நீர் நிறைந்தும் இருப்பதை ருசி பார்த்துவிட்டு ஓட்டல் அறைக்குத் திரும்பி, மதிய உணவு சாப்பிடாததால், எதிரே உள்ள சிறிய இந்திய உணவு விடுதியில் தால் கிச்சிடி, லெமன், புதினா கலந்த டீயோடு சாப்பிட்டு அறைக்குத் திரும்பி, பேக்கிங் முடித்து உறங்கப் போயாயிற்று.
இன்று பயண நாள். திட்டமிட்ட படி ரெடியாகி, அறையைக் காலி செய்து, டாக்ஸியேறி பன்னாட்டு முனையம் அடைந்து, சோதனைகள் முடித்து, மீதமிருந்த இந்தோனேசிய இலட்சங்களுக்கு Duty free பொருட்களை வாங்கிய பிறகு கேட் 9B ல் அமர்ந்து பயண நினைவுகளை அசை போட ஆரம்பித்தது மனது.
பண மதிப்பு இந்திய ரூபாயை விட குறைவே என்றாலும் , சுற்றுலாத் தளமாதலால், பொருட்களின் விலை, உணவு விலை அதிகமே. மசாஜ் மட்டும் இந்திய விலையை விடக்குறைவு, தெருவெங்கும் Spaக்கள் அதிகம்.
வெகு நாட்களாகப் பயணம் செய்ய திட்டமிட்ட ஒன்று, நிறைவேறிய மகிழ்வோடு, இண்டிகோ விமானப் பயணம் பெங்களூரு செல்ல ஆறு மணி பத்து நிமிடங்கள் ஆகுமென்பதால், ஆகாயத்தில் பறந்த படி எழுதியாயிற்று. அடுத்த பயணம் விரைவில் நண்பரோடு இருக்கலாம்.
( முற்றும்)
கருத்துகள் இல்லை:
கருத்துரையிடுக