மெல்லிய காற்று உடல் தழுவ மேனி சிலிர்த்தது
மெல்லியலாள் விரல் தடவ உடல் அதிர்வு கண்டது
சில்லென்ற காற்று இளங்காலைப் போதில் இனிமை சேர்த்தது
சிட்டுக் குருவியின் கீச்சுக் குரல் இதமாய்க் கேட்டது
பறவைக் கூட்டம் கூடு துறந்து பறந்து சென்றது
கறவை மாடு கன்றை அழைக்க அம்மா என்றது
தூரத்து ஆலையிலே சங்கு ஒலித்து நேரம் சொல்லியது
தூங்காத பாப்பாவின் அழுகைச் சத்தம் அலறலாய் மாறியது
கோயிலின் மணியோசை கோபுர உச்சியிலே ஒலித்து முடித்தது
கோலம் போட்ட வாலைக்குமரி புள்ளிகளைக் கோடுகளால் இணைத்தாள்
விடியும் நேரம் காட்சிபல கண்டது கண்ணின் ஓரம்
விந்தை உலகமடா விழித்திடு நீயும் என்றது ஒருகுரல் !
கருத்துகள் இல்லை:
கருத்துரையிடுக