எங்கிருந்தோ வந்த பறவைகள்

எங்கிருந்தோ பறந்து வந்த பறவைகள்
இங்கே கூடின பாடின படித்தன
இளைப்பாறி இனிதான நட்பாகி இசைபாடின
களைப்பாறி கதைபேசி கல்விகற்றன
மான்களோடும் மரங்களோடும் மணல்வெளியோடும் உறவாடின
மனங்கள் கலந்தன சிலபறவைகள் மணமுடித்தன
பொற்காலம் பொறுப்பில்லை சுதந்திரமாய்ப் பறந்தன
பொறியியல் என்றதோர் பட்டம் பெற்றன
மீண்டும் உலக வெளியெங்கும் பறந்தன
கண்டம் அனைத்தும் கடந்தன கடமையாற்றின
துணையொன்று இணைந்து கூடுகள் சேர்ந்தன
பறவைக் குடும்பம் பல்கிப் பெருகின
காலச்சக்கர சுழற்சியில் மீண்டும் சந்தித்தன
ஆலமரமாய் விழுதுகள் மரமிப்போது பெரியது
ஆயினும் அன்பால் அவ்வப்போது கூடின
ஆஹா எத்தனை அழகு எங்கள்கூட்டம்
புள்ளினங்கள் மீண்டும் அதேமரக் கிளைகளில்
பூபாளமும் மோகனமும் ராகங்களாய் தினந்தோறும் !