நம்புகிறேன் மாறுமென்று

வேதனைதான் மாற்றேதுமில்லை விடிவில்லை இருள்விலகவில்லை
போதனைகள் பயனில்லை மதம்பிடித்த யானைகள்தான்
சாத்திரம் படித்தென்ன சரித்திரம் மாறவில்லை
பாத்திரம் அறிந்தே பிச்சையிடல் வேண்டும்
கூக்குரல் எத்தனையெத்தனை காசுக்கே மதிப்பிங்கே
பாக்களும் பாரதியும் பழங்கதையாய்ப் போயிற்று
மாறிவிடும் என்றோஒருநாள் நம்பினோம் ஏமாந்தோம்
மாக்களாய் மனிதமனம் மடையர்களே மந்திரிகள்
சாக்கடையாய் அரசியல் சொல்லில் உண்மையில்லை
பூக்கடையிலும் நாற்றமென்றால் எம்நாடே உவமையாகும்
இளைய தலைமுறையோ ஓடுகிற திசையேவேறு
இன்னமும் நம்புகிறேன் இவையாவும் மாறுமென்று !