அமைதி கொள்

வாழ்க்கை விடைகாண முடியாப் புதிர்
குழம்பாமல் தெளிவான நீரேயில்லாத குளம்
பஞ்சு விற்றால் புயல் காற்றும்
உப்பு விற்றால் பெருமழையும் பெய்யும்
நிம்மதி தேடிஓடும் மனிதர்கள் நிரந்தரம்
நினைவலைகள் வண்ணம் மாறுதல் தினம்தினம்
தேடுதல் வேட்டை சாகும் வரையில்
தேய்ந்து ஓய்தல் நிரந்தர தூக்கத்தில்
தங்கமுலாம் பூசிய அணிகலன் அனைவரும்
தேய்த்துப் பார்த்தால் பித்தளை தகரம்
மிருகமும் தெய்வமும் கலந்த கலவைதான்
மானிடம் மட்டும் அவ்வப்போது தோன்றும்
நெல்வயலில் நெல்நாற்றே களையெடுக்க நேரும்
நெஞ்சம் பதைக்கும் கவலைகள் பெருகும்
நேர்மை கண்ணெதிரே கொலையுறும் காட்சி
வீரம் விவேகம் சமாதியில் உறக்கம்
உலகம் யுகஅழிவுக்காய் காத்திருக்கும் நேரம்
மாற்றம் அப்போதே வரும் மற்றொரு வடிவில்
மனதைத் தள்ளிவை அதுவரை அமைதிகொள் !