காலம் செய்த கோலமிது

மலர் பூத்த மனமாய் மலர்ந்தாய்
மகிழம்பூ வாசமாய் பரவி நின்றாய்
திரை போட்டு மறைக்காத சிந்தனைகள்
தித்திக்கும் மனக் கேணி நினைவுகள்
காலம் செய்த கோலமிது கண்ணுறங்கு
ஞாலம் பெரிது நம்பிக்கை கொள்
வானமும் பூமியும் வாழும் கண்களுக்கு
வண்ணத்துப் பூச்சியாய் பறந்து திரிந்திடு
கோலங்கள் போடவே புள்ளிகள் வரிகளாய்
கோர்வையாய் வரிகளே கவிதையின் தோன்றலாய்
வாழ்க்கையின் வரவும் செலவும் பலவகையானவை
வகுத்தலும் பெருக்கலும் கணக்கில் அடங்கிடும்
வருவதும் போவதும் இயற்கையின் நியதி
வாழும் வகைக்கு வழியிது கண்டுகொள் !