எதுவெல்லாம் காதல் எடுத்துச் சொல்வாயா
எவரோடு எவருக்கு காதல் வருமய்யா
அன்னையின் காதல் அழகு மகவோடு
தந்தையின் காதல் பிள்ளைகள் உயர்வில்
நண்பனின் காதல் தன்னலமற்ற ஒன்று
நகரத்தார் காதல் தாமரைஇலைத் தண்ணீர்
உத்தமர் காதல் உண்மை சொல்வதில்
பித்தனின் காதல் பிதற்றும் சொற்களில்
கற்றவர் காதல் கற்கண்டாய் பேச்சினில்
சொற்களில் செய்கையில் சோர்விலர் செயல்வீரர்
பற்றுதல் பக்தியில் பரமன்மேல் காதல்
கொற்றவன் காதல் குடிகளின் நல்வாழ்வு
கற்களைச் சிலையாய் வடிப்பவன் சிற்பி
சிற்றுளி படைக்கும் காதலின் சின்னம்
காதல் வருவது எவ்வழி அறியோம்
காவியக் காதலில் சோகத்தின் இழைகள்
மோதலில் காதலும் முகிழ்ப்பது உண்டு
மோகத்தில் வருவது காமத்தின் காதல்
எண்ணற்ற வகைகள் காதலில் உண்டு
எண்ணிப் பார்த்திட தினமொன்று வேண்டுமோ?
கருத்துகள் இல்லை:
கருத்துரையிடுக