காத்திருக்கும் காலமெல்லாம்

 பற்பல வர்ணங்கள் பற்பல மதங்கள்

பாரத தேசமென்று பெயர் அதற்கு

கற்பதும் பலமொழிகள் காண்பது பலநிறங்கள்

என்றாலும் ஒற்றுமை ஓங்கி நிற்கும்

வளமான நாடென்ற பெயரும் இதற்குண்டு

வந்தோரை வரவேற்கும் விருந்தோம்பல் உண்டு

கனிம வளங்கள் காடுகள் தன்னகத்தே

பனிச் சிகரம் பாய்ந்தோடும் நதிகள்

நீண்ட கடலோடு இயற்கை எழிலுமுண்டு

பண்டைய நாகரீகம் பலவும் தோன்றியதிங்கே

எதிலும் குறைவில்லை என்றேன் இறுமாப்பாய்

ஆணவக் கொலைகள் அழிந்ததா எனக்கேள்வி

ஆள்கின்ற வர்க்கம் ஊழலற்றதா வினாக்கள்

உழவன் உயர்ந்தானா வறியவன் ஏற்றமுண்டா

உனதென்ற எனதென்ற

சண்டைகள் மறைந்ததா

விலைகள் மலிந்தனவா வீதிகளில் அமைதியுண்டா

விழுக்காடு வளர்ச்சியிலே உயர்வுண்டா உண்மையிலே

கனவுகள் கண்ட கலாமின் கற்சிலை

கற்பனைகள் நிஜமாக காத்திருக்கும் காலமெல்லாம்