இரத்தமில்லா சுதந்திரம்

உத்தமர் வாழ்ந்த நாட்டில் உன்மத்தர்கள்
இரத்தமில்லா சுதந்திரம் வீதியில் குப்பையாய்
வேதாளம் மரமேறி சாத்திரம் பேசுகிறது
பாதாளம் நோக்கியே பயணம் பாவிகளால்
எதற்காகப் பெற்றாயோ சுதந்திரம் தந்தையே
எத்தர்கள் நாட்டினில் ஏளனம் பேசவா
புத்தனும் நீயும் போதித்தவை புத்தகத்தில்
புத்தி கெட்டோரே பீடத்தில் ஐயகோ
நாட்டுக்காய் உயிர் துறந்த உத்தமரே
நானிலத்து நன்மைக்கு வழியொன்று சொல்வாயா
அழிகின்ற சமுதாயம் தடுத்தாள என்செய்வேன்
பழியொன்றை உன்மீது சுமத்தும் பாதகர்கள்
மீண்டும் வந்திடு அகிம்சை வேண்டாம்
மிலேச்சரை களையெடுக்க ஆயுதம் வேண்டும்